Ava Dik Em

Kan nula hmelțhate an zakzum a, hmelchhia an káwlhráwng thung a. Inbualna tui nei daih mang lote hian kapkâr khuhna daih mang lo _bikini_ an lo ha ve a.

Lainate biak dawna 'ka zak' tite hian, mi zingah kumkár lang vek khawpa thawmhnaw tâwt hâk an zak leh si lo va.

Rái tura ngaih kan vawkpui a ching a, rái lo tura ngaih kan fanuin sáwn a pai thung a! Fa nei tlâkin an nei ngam lo va, nei tlâk lote an chhangchhe thung a!

Min chawmtu tur zawk kan fapate lah hi kan _pension_ hnu thlenga chàwm an ngai a. Inbiak nana _balance_ nei ngai lote hian _filter_ sikret an zu reng thei a.

Mizo hmel pute hi _Robert-a_ te an ni a, a vai hmel pu zawk hi Zohmangaiha te an ni leh daih lawi a. _Gym_-a thirhlum lek vú vú theite hian ina _gas_ búr ruak an cháwi zo leh si lo va.

Lirthei khalh chak apiang hi chhawr tlak loh khawpa zawi an ni a. Thil hre chiang lo apiang an țawng huai a. Huhova huaite hi a fála dawih an ni deuh ziah.

Sa leina neiin an ei ngam lo va, ei ngamin a leina an nei lo va. Ruai kil tura beiseite an hman lo va, beisei loh zawkte'n an lim nghek a.

Hausain rethei lem an chang a, retheiin hausa lem an chang a.

Hlo thlawh mamawh lova hausaten huan-ram an lei a, hlo thlawh mamawhten _party office_ an vil thung a.

NLUP sum kan inchuh luih luih hnu lawkah mahni khaw kawng chhe siamin kan hnatlang zui leh luih luih a!

Khawpuia pèm intihhmuh chungin khaw chhuak pawl din kan uar leh si.

Gas_ kan _black_ laiin _Jio_ kan _free_ a. _Trained teacher_ aiin _untrained teacher_ kan ring zawk a. Sangha note luiah kan chhuah a, sangha lian chu _Andhra Pradesh_ ami kan la lur a.

Theologian-in politics an sawi a, politician-in theology! Kan chanchin chhia thupin Chanchin Țha kan hril a. Kan chàwm thauten 'Chawmhlawm Hnam' min ti zui a. Kan zawl neihchhuna golf min khekhpui tum țalh pawl lah bo lo! Kei tehlul lah eng ka ni bik bawk si lo!

Vanneihtluanga Editorial, Lengzem Oct 2017

Share This